陪月遇上懶惰媽媽「血淚屎」 陪月：推入房門屎味加臭味攻鼻
發布時間： 2018/04/18 17:42
最後更新： 2018/04/19 18:58
▲ 70後陪月Yvonne在facebook開設「陪月辛酸血淚屎」專頁，分享做陪月親身目擊的真人真事。
陪月辛酸「血淚屎」！沒錯，是「屎」，不是「史」！70後陪月Yvonne在facebook開設「陪月辛酸血淚屎」專頁，分享做陪月親身目擊的真人真事，其中做陪月7年最難忘的是一位新手媽媽稱產後太累，既不餵人奶，也不自理。新手媽媽在床上大小便，連換M巾也要人代勞，更滲到床褥滿是血也不理；而BB出世5天沒沖涼，一身老泥，更為省尿片被屎醃到大脾紅損。
Yvonne所寫的「血淚屎」在網上瘋傳，不少人質疑是否虛構，但Yvonne表明如此不可思議的事100%真實，事發於2014年，「我也從來沒想像過一個人可以這樣污糟！」
「陪月辛酸血淚屎」之懶惰媽媽原文如下：
呢位媽媽有工人有阿媽
佢媽媽又幫佢請左我做陪月
第1日我去到，新手婆婆：你幫下口叫下阿女去沖涼，佢個身臭架！
我：好，我入房睇睇媽媽先。
我叩門推入房，哇！ 臭到呢！ 屎味加臭味傳晒入我的鼻，想嘔
我：新手媽媽，你好吖，我係陪月姨姨，今日第1日返工架！
新手媽媽：我開刀生，我怕痛5（唔）想落床！
我：咁你都要去廁所架？個時順便去沖個涼洗下頭，出到嚟我立即幫你吹頭，5（唔）怕會入風。
新手媽媽：我都無落過床，工人姐姐幫我抹左2次身（生完第6日，返左屋企2日） ，阿媽會幫我換衛生巾。
我反晒白眼，吸1大啖氣，手揸緊拳頭：其實咁樣對你傷口有影響架，好易有細菌。阿B食奶個時好易接觸到，佢咁細個，發燒可以好嚴重架！
新手媽媽：我都無餵人奶，阿媽幫我餵奶粉。我生完好攰，咩都5（唔）想做。
我：咁我嚟左幫手，可以扶你去到廁所，行多步，個傷口都會復原得快啲。
新手媽媽：好喇，等陣我急，你陪我去喇。
我返出去整餸煲湯煲薑水，幫阿B沖涼時，發現阿B污糟多老泥，啲頭泥又無整理，1舊1舊咁。
我問新手婆婆：點解阿B咁多老泥既，頭泥又5（唔）清理甩左出嚟個啲。
新手婆婆：BB返嚟都無沖過涼，我5（唔）記得左點沖喇。同埋我地一家都習慣左3幾日先沖1次涼。
我擘大個口得個窿，心諗，等陣到個阿媽，我屎梗。
好在我袋長期有手套同口罩。
【延伸閱讀】陪月血淚史極速吸萬like 陪月：警剔自己勿做麻煩奶奶
近11點，屎神終於來召喚！
新手媽媽話要去廁所加沖涼，叫我陪1次，話月尾會加返啲人工比我。我心諗我5想要呢啲多餘錢。
入房，我打個窗簾打開窗戶，個景好靚，有河境。
新手媽媽掀開張厚被，我被個情況嚇得退後2步。床單好多血漬加屎漬，加上惡露既味道，我戴住雙重口罩聞到都想嘔！
新手媽媽條睡褲，深深淺淺既血漬，如果佢5（唔）郁，我諗我估佢應該係被人殺死左架喇！
我先扶新手媽媽入廁所，叫佢坐定定除左衫褲先。
跟手我叫工人姐姐掉晒啲被同床單，實在太多血了。新手婆婆見狀，就話：我呢個女，真係由細到大都污糟邋遢，哎呀！ 真係失禮屎人！ （都係你教得好啫，3幾日先沖1次涼！）
我攞埋薑水返入廁所，由頭幫佢洗落腳！
頭髮已經1餅野咁，慢慢梳慢慢洗再吹乾用左45分鐘！
個胸又漲又硬，乳頭啲乳線已有堆奶乾左硬晒咁，塞實晒啲乳線。
我用熱敷清左啲污糟物先，再幫按摩舒緩，用手揸左啲奶出嚟。2邊胸夾埋搞左1個鐘。（我已身水身汗）
肚皮傷口既膠紙，好好彩係冇被波及，我再貼上1大塊防水膠布，幫佢沖身。
【延伸閱讀】當坐月遇上麻煩奶奶 陪月給奶奶的忠告：勿逢事必反
重頭戲終於來到，洗下身！
我叫佢自己用花灑洗下，起碼洗左啲痴住係毛毛啲血塊先喇！
但佢竟然... ...成個屎忽坐落盤薑水到！ 佢痛到叫晒救命，我唯有不停幫佢沖凍水。成盤薑水變成臭血水！ 佢個屎忽同妹妹中間條罅，夾住好多臭既血塊，不停沖水都仲有。
最後，我叫佢自己用梘液捽下雙腳。比我見到佢啲腳趾甲係黃晒翻晒出嚟，一問之下，原來佢大肚10個月以來無剪過！
心入面講左過萬句粗口。有無人頂得順呢啲女人？ 原來係有架！ 新手爸爸仲係幾好樣同乾乾淨淨架！
第2日，我去到放低餸，換衫去睇下媽媽先。（我今日醒左，帶多左幾件衫同口罩，成盒手套）
房，臭味仲有但明顯少左。
我問媽媽：點吖，尋日沖完涼洗左頭，尋晚有無好瞓左吖？
媽媽：我發現我啲皮膚1塊塊甩出嚟！
我：邊到吖？ 等我睇睇？
媽媽打開件衫，指住個胸：個Lin頭（乳頭），係咁流奶，我諗住瞓平應該5（唔）會再出，點知瞓醒成身都係咁甩皮。
我一睇，真係無眼睇。個啲一塊塊，係乾左既母乳嚟！ 因為媽媽打平瞓，啲母乳流出嚟佢無用乳墊 （直頭無帶胸圍）流到個胸周圍都有，乾晒又甩甩地咁。。。
我：你5（唔）餵人奶，要用個緊身啲既胸圍，戴幾日，就會自然收奶。同埋我會煲啲回奶湯你飲。（我一講完就知自己講錯說話）
媽媽：好囉~又可以幾日先沖1次涼。
我：其實你張床褥係未應該換左去呢，太多惡露過晒底。會有好多菌。
媽媽：都要架喇，平時我啲M（月經）成日都過底。
我：半夜起身換下，或者M到時墊條大毛巾係床單面。
媽媽：條姨媽巾（衞生巾）都未滿，我5（唔）會換住。我等到滿晒先換架。
我：5（唔）好吖，會好易發炎發臭架。
媽媽：我媽教我既，佢話5（唔）洗成日換架！ （果然好家教！）
我：5（唔）好吖，有事個時就收尾長喇。
我：你起身先，我今日再幫你沖涼洗頭，係呢幾日架咋，過埋12朝，你自己做架喇。
媽媽一手掀起張被，我見到一包野，好臭，好似屎咁臭。
我：個包咩嚟架？ 咁臭既？
媽媽：我見工人姐姐今朝5（唔）得閒扶我去廁所，所以我係床度屙左紙紙落片片到，包好左無流出嚟架！
我5（唔）記得左講，呢位媽媽懶到要工人姐姐比便盤佢在床上大小，晚上仲會用成人片片架。
我嚇到行屍走肉咁叫媽媽入廁所，再叫姐姐連床褥同枕頭都推出垃圾房掉埋。張床褥係黑色架！
我幫媽媽洗頭個時，見到好多血漬，我問：你搲損左個頭？
媽媽：5（唔）係吖，可能係啲M血，個垃圾桶係我床頭柜入面。（呢一刻，我好有衝動掉埋張床！）
今日好啲，洗頭吹乾用左15分鐘。
再用熱敷搞埋2邊胸，又半個鐘。
肚皮傷口仍然無被波及。
【延伸閱讀】母乳塞爆雪櫃VS泵不出奶 母乳育嬰協會拆解母乳不足的迷思
重頭戲又來了！ ！
媽媽話今朝屙過紙（屎）... ...
前面毛毛痴實晒啲血
後面毛毛痴實晒啲屎
我無眼睇，叫佢自己用手捽下
佢每捽一下就聞一下
我：污糟吖，5（唔）好聞喇。
媽媽：我想聞下惡露既味道。你地個個話臭，我又5（唔）係好覺得喎。
我心諗：梗係喇，你身體構造咁特別。堂堂一個大學畢業生，可以咁無common sense！
我：今日5（唔）好坐落盤薑水到喇，你用毛巾慢慢洗。
話口未完，又一個屎忽坐左落盤薑水到。
我無眼睇，叫媽媽沖好涼抹乾身。我怕左佢，叫左工人姐姐入去幫手。
我換衫煲落湯同整好飯後，再換件衫，睇下阿B。我見阿B條片滿晒屎尿。
於是問工人姐姐阿B幾點前換過
婆婆搭口：上餐食奶到依家
我睇睇記事簿... ...上餐奶？3個鐘頭前？我打開片片1睇，阿B個屁股，袋底，大脾罅滿晒紙紙（屎屎），已醃到傷左。
我問婆婆：點解5（唔）叫工人姐姐密啲幫阿B換片吖？
婆婆：條片都未滿晒，5（唔）好嘥野嘛。（2母女既model answer，真係好家教）
我：婆婆，真係5（唔）好吖！ 阿B感覺到片片滿會喊會5（唔）舒服之外，啲尿液都會倒流返入腎臟，到時為左慳個2，3蚊，搞到阿B有事就5（唔）好喇！
婆婆：咩原來會咁架，我真係5（唔）識。好在請到你咋。我女大學又5（唔）係讀呢科，所以佢都5（唔）係好識教我。
我嘔晒血，心諗，如果換條片都要讀大學，我做得教授喇！
真陰功，阿B邊沖涼邊大喊，我唯有用厚抹花屎令呢個方法，等傷口無咁痛同快啲好，順便教埋工人姐姐同婆婆。
開午飯比媽媽同婆婆食後，我問準（准）先生，同工人姐姐2個拿拿聲去樓下商場間海X，是旦求其買張床褥加枕頭返上去，比媽媽瞓住先。
工人姐姐問我：姨姨，我可5（唔）可以都買張新架，我個張... ...係太太以前瞓過架... ...
我立即明晒，我：買，買完張單先生5（唔）比錢，我比！ （我見特價$179先咁大聲答）
原文刊於「陪月辛酸。血。淚。屎」Facebook，TOPick獲授權轉載
